നിലന്പൂർ: ലൈസൻസില്ലാതെ വീട്ടിൽ സൂക്ഷിച്ച പടക്കങ്ങൾ നിലന്പൂർ പോലീസ് പിടിച്ചെടുത്തു. അകന്പാടം ആനപ്പാറയിൽ പോലീസ് നടത്തിയ പരിശോധനയിലാണ് വിവിധയിനം പടക്കങ്ങൾ പിടിച്ചെടുത്തത്.
സംഭവത്തിൽ ആനപ്പാറ പന്തലിങ്ങൾ സുനിൽകുമാറിനെതിരേ എക്സ്പ്ലോസീവ് ആക്ട് പ്രകാരം പോലീസ് കേസെടുത്തു. വിഷു പ്രമാണിച്ച് വിൽപ്പന നടത്തുന്നതിനായാണ് പടക്കങ്ങൾ ഇയാൾ സൂക്ഷിച്ചതെന്ന് പോലീസ് പറഞ്ഞു. ചൈനീസ് ഇനങ്ങളുൾപ്പെടെ വലിയ ശേഖരമാണ് വിൽപ്പനയ്ക്കായി സൂക്ഷിച്ചിരുന്നത്.
നിലന്പൂർ പോലീസ് ഇൻസ്പെക്ടർ ബി.എസ്. ബിനുവിന്റെ നിർദേശപ്രകാരം എസ്ഐ കെ. രതീഷാണ് നടപടികളെടുത്തത്. ഉജേഷ്, അനസ്, സുനില എന്നിവരും പരിശോധന സംഘത്തിലുണ്ടായിരുന്നു. പിടിച്ചെടുത്ത പടക്കങ്ങൾ നിർവീര്യമാക്കുന്നതിനുള്ള നടപടികൾ സ്വീകരിക്കുമെന്നും പോലീസ് അറിയിച്ചു.